З 12 па 14 кастрычніка ў горадзе Гродна адбыўся Першы нацыянальны форум «Музеі Беларусі».  У ім прынялі ўдзел больш за 150 музеяў і амаль 800 спецыялістаў з 17 краін свету. На форум у Гродна завіталі прадстаўнікі міністэрстваў культуры і некаторых музеяў з Расіі, Польшчы, Літвы, Латвіі, Ізраіля, Аўстрыі, Нідэрландаў, Германіі, Славакіі, Украіны і іншых краін. Акрамя таго, у гэтым мерапрыемстве актыўна ўдзельнічалі фірмы, якія вырабляюць музейнае абсталяванне, займаюцца турыстычным бізнесам.

         Пачаўся форум з урачыстага адкрыцця, дзе ўдзельнікаў і гасцей мерапрыемства вітаў міністр культуры Рэспублікі Беларусь П.П.Латушка і губернатар Гродзенскай вобласці С.Б.Шапіра.

         Жыхары і госці Гродна на працягу ўсіх трох дзён маглі пазнаёміцца з галоўнай экспазіцыяй форуму. Для яго ўдзельнікаў была падрыхтавана дэманстрацыйная і дзелавая праграма (у тым ліку – міжнародная секцыя). Жадаючыя мелі магчымасць падчас экскурсіі пазнаёміцца з гісторыяй абласнога цэнтра, пабываць у музеях горада, прыняць удзел у адкрыцці новых выставак, наведаць Абласны драматычны тэатр.

         Прыняў удзел у Першым нацыянальным форуме "Музеі Беларусі” і Ашмянскі краязнаўчы музей імя Ф.К.Багушэвіча. Не адзін месяц быў затрачаны на тое, каб дастойна прадставіць свой музей. На пляцоўцы супрацоўнікамі быў паказаны самы папулярны турыстычны аб’ект Ашмяншчыны – Гальшанскі замак. Гасцей нашай экспазіцыі разам з вядучымі сустракаў вялікі князь літоўскі, кароль польскі Уладзіслаў Ягайла (артыст народнага тэатра Аляксандр Спірыдонаў) з жонкай – Соф’яй Гальшанскай (дырэктар Гальшанскага сельскага дома культуры Таццяна Завадская), якія не толькі паведамі гісторыю Гальшанскага краю, але і далі наказ сваім нашчадкам любіць і аберагаць родную зямлю.